प्राख ।
असार ६, बारा ।
बारा प्रहरीले नन्दु राउत कुर्मीको हत्यामा संलग्न मुख्य आरोपी उमेश जैसवालसहित पाँच जनालाई नियन्त्रणमा लिएको छ। गत जेठ २९ गते कलैया उपमहानगरपालिका वडा नम्बर १४, बघवन टोलस्थित उमेश साहको राइस मिल्सअगाडि ५० वर्षीय नन्दु राउत कुर्मीको कुटपिटबाट मृत्यु भएको थियो।
मृतकका छोरा २६ वर्षीय दिपेन्द्र पटेलले दिएको जाहेरी दरखास्तअनुसार प्रहरीले अनुसन्धान अगाडि बढाएको थियो। घटनामा संलग्न रहेको आरोप लागेका व्यक्तिहरूमा बघवन टोलका उमेश जैसवाल (मुख्य आरोपी), उनकी श्रीमती ३५ वर्षीया रन्जु देवी, छोराहरू २० वर्षीय सुमित जैसवाल, १८ वर्षीय सुजित कुमार जैसवाल र २५ वर्षीय अमित जैसवाल, साथै रामचन्द्र प्रसादका छोरा ३४ वर्षीय दिगम्बर प्रसाद जैसवाल रहेका छन्
प्रारम्भिक अनुसन्धानअनुसार घटनाको कारण मृतकका नातिनी र करैयामाई गाउँपालिका वडा नम्बर ७, उम्मजनका गौतम पासवानबीचको भेटघाट रहेको खुल्न आएको छ। यस विषयमा मृतककी श्रीमतीले प्रतिवादी उमेश जैसवालका कान्छा छोरा सुजित कुमार जैसवाललाई हातपात गरेपछि त्यसैको रिसिइबी साँध्न प्रतिवादीहरूले मृतक काम गरिरहेको मिलमा पुगी कुटपिट गरेको प्रहरीले जनाएको छ। कुटपिटबाट गम्भीर घाइते भएका नन्दु राउत कुर्मीको अस्पतालमा मृत्यु घोषणा भएको थियो। प्रहरीलाई घटनाको करिब एक घण्टापछि मात्र जानकारी प्राप्त भएको थियो। आज बारा प्रहरिले पत्रकार सम्मेलन गरि मुख्य अभियुक्त सहित ५ जनालाई सार्वजनिक गरेकाे छ ।
