बाराका तिन वटा स्थानीय तहको निति तथा कार्यक्रम सहित बजेट अन्योलमा ।

प्राख, बारा ।

आगामी आर्थिक वर्ष २०८२/८३ का लागि नीति, कार्यक्रम र बजेट सार्वजनिक गर्ने तोकिएको म्याद सकिँदा पनि बाराका सबै स्थानीय तहले बजेट सार्वजनिक गर्न सकेका छैनन् । जिल्लाका १६ मध्ये १३ वटाले मात्र नीति तथा कार्यक्रमसहित बजेट सार्वजनिक गरेका छन् । जीतपुरसिमरा उपमहानगरपालिका, निजगढ नगरपालिका र सुवर्ण गाउँपालिकाले भने अझै सार्वजनिक गर्न सकेका छैनन् ।

बजेट सार्वजनिक गर्नेमा कलैया उपमहानगर, कोल्हवी, सिम्रौनगढ, पचरौता, महागढीमाई नगरपालिका तथा करैयामाई, पर्सौनी, परवानीपुर,बारागढी, आदर्शकोतवाल, फेटा, विश्रामपुर र देवताल गाउँपालिका रहेका छन् ।

सदरमुकाम रहेको कलैया उपमहानगरले सबैभन्दा धेरै १ अर्ब ७२ करोड ७३ लाख ८७ हजार ७ सय ४९ रुपैयाँको बजेट ल्याएको छ । त्यसपछि महागढीमाईले ८१ करोड ५८ लाख, कोल्हवीले ७९ करोड २३ लाख, सिम्रौनगढले ६७ करोड ७१ लाख, पचरौताले ६५ करोड ३१ लाख रुपैयाँ बराबरको बजेट सार्वजनिक गरेका छन् ।

यता,निजगढ नगरपालिकाको नगर सभा भने फेरि पनि स्थगित भएको छ । नगर प्रमुख सुरथ पुरीले सोमबार आह्वान गरिएको नगर सभा कार्यपालिका सदस्यबीच सहमति नजुटेपछि स्थगित भएको जानकारी गराएका छन् । त्यसअघि सोमबार पनि तय भएको बैठक स्थगनमा परेको थियो ।

नगर प्रमुख पुरी भने तोकिएको समयसीमाभित्र नै नगर सभा सम्पन्न गर्नुपर्ने बाध्यता रहेको बताउँदै सिलिङ्गको विषयमा पछि छलफल गर्न सकिने तर्क राख्दै आएका छन् । तर, मंगलवार नगर प्रमुखले कार्यपालिका सदस्यहरूको मागपत्र समेत अस्वीकार गरेका छन् ।

बजेटसम्बन्धी विवाद चुलिँदै जाँदा स्थानीय विकासका कार्यहरू अन्योलमा पर्ने देखिएको छ । निजगढ नगरपालिकाको अर्को नगर सभा कहिले बस्ने भन्ने अझै टुंगो लाग्न सकेको छैन ।

यसबीच सुवर्ण गाउँपालिकाले भने आगामी असार १८ गते बजेट सार्वजनिक गर्ने जनाएको छ ।