रौतहटको राजदेवी नगरपालिकाको ब्रम्हपुरी टोलमा आइतवार मध्यरात आगलागी हुँदा १२ लाख बराबरको धनमाल जलेर नष्ट भएको छ । राजदेवी नगरपालिका वडा नम्वर ९ ब्रम्हपुरी टोलको कालिमन्दिर छेउमा बच्चा सिंहको जस्ताले छाएको चार कोठे पक्की घरमा राति करिव २ बजे अचानक आगलागी भएको थियो ।
आगलागीबाट करिव १२ लाख मूल्य बराबरको धनमाल जलेर नष्ट भएको पीडितले बताएका छन । सशस्त्र सीमा सुरक्षा बल नेपाल नम्वर ११ गण हजमिनियाका अनुसार, सिंहको घरमा सबै जना सुतिरहेको अवस्थामा खाना पकाउने चल्होवाट आगो सल्किएको बताइएको छ । विओपी वेलविछवाबाट सशस्त्र प्रहरी निरीक्षक सुभाष खत्रीको कमाण्डमा ११ जना र प्रहरी चौकी लक्ष्मिपुर वेलविघवावाट प्रहरी सहायक निरीक्षक हृदेश राउतको कमाण्डामा चार जना र स्थानीय वासिन्दाहरुको सहयोगमा आगो नियन्त्रण लिएको र पछि गौर नगरपालिकावाट गएको दमकलले करिव ३ बजे आगो निभाएको सशस्त्र प्रहरीका एसपी विक्रम हुमागाईले जानकारी दिनुभयो ।
आगलागीमा परेर मोटरसाइकल एक थान, साइकल ३ थान, लत्ताकपडा, गहुँ, धान, चामल, गहना, एक लाख नगदसहित चार कोठे घर जलेर नष्ट भएको हो ।
