बारा । प्रास ,१ असार
बाराको कलैया स्थित रामराजा मोहनविक्रम क्याम्पसका प्रमुख हरिभूषण कुशवाहाको गोली हानी हत्या गरिएको छ ।
आदर्श कोतवाल–२ खजुरियाटोल निवासी क्याम्पस प्रमुख कुशवाहा शुक्रवार साँझ साढे पाँच बजे घरबाट कलैया फर्कने क्रममा वडा नं ३ बतरास्थित लँगहासन माई मन्दिर नजीक चारजना अज्ञात व्यक्तिले घेरा हालेर गोली प्रहार गरेका थिए।
गोली दाहिने कोखामा लागेर घाइते क्याम्पस प्रमुख कुशवाहाको उपचारको क्रममा वीरगंजस्थित वयोधा अस्पतालमा पौने सात बजे निधन भएको छ ।
बारा प्रहरीका प्रवक्ता प्रहरी नायब उपरीक्षक दधिराम न्यौपानले अज्ञात समूह गोली प्रहार गरेर फरार भएकोे र फरार भएकाहरुको खोजी कार्य तीव्रका साथ थालिएको जानकारी दिएका छन । घटनामा सँलग्न भएको आशंकामा प्रहरीले दुईजना व्यक्तिलाई नियन्त्रणमा लिएर अनुसन्धान गरिरहेको प्रहरी प्रवक्ता न्यौपानेले जानकारी दिएका छन् ।
